[احمد العراقي]

صور من الطف

بالشعر لمّن نسولف بالحسين
انشوف صورة اتخالط الدم ابدمع

ومن نصوّر حزن زينب عالچفيل
اتطيح نجمات السماء وتنفجع

ومن نسولف عن گلب ضم الطفوف
تبچي من ضيمه القصيدة وتمتنع

يا گلب عاشور چم سهم احتويت
وچم رمح غدّار رادك تنشلع

يا نفس مخنوگ من هم العيال
وي رضيع حسين طايح منصرع

يا حنين امشبّع ابلوعة وانين
ابصوت طفلة من الالم ما ينسمع

يا امل ضاوي انسرگ بيد الظلام
ابليل مات ونوره بطل ما يشع

يا حلم بعيون ما تعرف تنام
ابنار فرگه الراح ذايب چن شمع

يا فجيعة ويا دمه امفيض التراب
ويا مواقف مرها ابد ما ينجرع

يا صور طف البطولة الما يموت
ويا ملامح زود ما يعرف ردع

هاج لعنان السمه ابعز محتواه
وثار بركان الحمى من اطهر نبع

ثار صوت حسين واهتز الظلال
وصار بنيان الشرك بانزل وضع

هذا هو الطف تميز عن سواه
يم عتبته اسمى المفاخر تنجمع

باب للرايد حياة ابلا خضوع
وسچة ما تحوي عدا الحر والورع

باب للرايد يحف اسمه الخلود
وسچة بيها السار يعلى ويرتفع

باب يوم الليل ما مارگ عليه
وسچة بانوار المجد تسطع سطع

احنه مو بالعاطفة انشوف الحسين
انشوف شوف انسان عاقل مقتنع

انشوفه بعيون الحقيقة الما تزيغ
حسين حق الله الظهر بيه الشرع

يلتگول حسين بيه عندك شكوك
اتجرد وشاهد تنظره ابيا وضع

رايح اتشوفه جبل راهي ابشموخ
وصرخته ابلبة ضميرك تنسمع

احمد العتابي
العراقي