متى يرتاح العراق
 

متى يرتاح العراق
_____________

عباس طريم

__

العراق وي الزمن خلصه لوعات

من يوم انولد ادم وحوه

اكل لمن تعب عالراس طكات
وكلهه اتصيح هذا الابي اشسوه

ما يعرف ابد معنى المسرات
مثل طفل الفقد معنه الابوه

العراقي اليوم من كثر المعاناة
ما يعرف صديقه من عدوه


ما ينعرف من يمك اذا فات
جنه اعله النعش محمول توه

محني الظهر ها ها وكع ها مات
تعبان و يشيل الجدم كوه


مثل واحد غريب وعثر بموات
وشرد , والناس كله اتصيح هوه

حياته ابكل بلاد الله مأسات
وحظه مصخم باي ارض نوه


الدنية اتصيح مو صاحب حضارات
مو هو البنه وعمر وضوه

عجيبة شصار بعقول القيادات
التنصح بالتلاحم والاخوه

شعب مسلم ومهبط للديانات
ويؤمن بالاله وبالنبوه

مبعثر بالدول بس عالاعانات
عايش بالحياة اتكول كوه

شاف الويل من كل الحكومات
وبنيرانهه الحمره تجوه

ما فد يوم طالب بالوزارات
ولا زل وحجه ابشينه و تفوه

وبغير العراق الطيب الذات
ابد هذا المحارب ما تقوه

اله بكل الدول اسمى اعتبارات
عراق وتنحني الكل السموه

سيف مجرب ويرفع الهامات
ورب الكائنات انطاه قوه

يسمونه الابي وكاضي الحاجات
كريم وحين يعطي ما يتروه

وارضه الله حط بيهه الكرامات
لكل زاير تحت جدمه اتطوه

لان بيهه الايمة اهل المنارات
ال البيت اصحاب المروه

وبي نهر الفرات اليجري خيرات
وعله طول الزمن اجيال روه

عراق وشامخ ابكل القياسات
فوك , وكل عباد الله جوه
__
عباس طريم
__