آه يا زينب تصيح
 

الشعر حين الكتبته = شفت بعيوني دمعته
تريد توصل للضريح = وآه يا زينب تصيح
؁؁؁
حتى ميلادݘ يزينب = لوعه واحزان ودمع
عشتي ايامـچ غريبه = وما تغير هالوضع
شلون نفرح والاعادي = حوطتـچ نستمع
لاتقيمون احتفال = وبالله طفوه الشمع
وين شبان العقيدة = لــگبر زينب تستعيده
وتنصر حسين الذبيح = وآه يا زينب تصيح
؁؁؁
وين عابس خله ينهض = وين ابن ظاهر حبيب
مثل ما بالغاضرية = واسوا حسين الغريب
نــگلهم اليوم الاعادي = هناك والمنظر رهيب
يبن ظاهر هالتنادي = زينب ولا من مجيب
وانته يوم الغاضرية = حشمت اهل الحمية
بالسيوف الما تطيح = وآه يا زينب تصيح
؁؁؁
كتبوا بنصّ العبارة = ترحلين ويه النظام
ووجهوا كل المدافع = والبنادق عالمقام
مثل ما بالطف يزينب = حرّڰوا كل الخيام
رجعت اليوم ال اميه = تريد منج الانتقام
شلون افرح باعتقادي = وانتي ما بين الاعادي
عبرتي ما تستريح = وآه يا زينب تصيح
؁؁؁
وين انصار العقيدة = وين اهل التضحيات
تــگصد الشام بكتيبة = وتسحــگ خشوم الطغاة
وتــگطع اݘفوف التجاسر = والحقد والمنكرات
هذي زينب بت محمد = هذي قدس الحرمات
انتفض عين الطليعه = من سمع هاي الفجيعه
ودمعته بغيرة تسيح = وآه يا زينب تصيح
؁؁؁
كل ملائكة القداسة = والرسل والانبياء
كلها حزنانه عله زينب = والحسين بكربلاء
نوح بالطوفان يدعي = ربي اهلك الادعياء
ومريم اتواسي الزݘــية = فاطمة خير النساء
وصوت الآم المسيح = وآه يا زينب تصيح
؁؁؁
آه يا يزينب شعار = لكل شريف وكل غيور
زينب ومبدأها ثورة = زلزلت اهل الفجور
ولخدرها الثار قائم = ينتظر يوم الظهور
هذا وعد الله وتحتم = من قديمات الدهور
ربي عجل في ظهوره = يظهر ويحيينه نوره
بحسره للشر من يزيح = وآه يا زينب تصيح
؁؁؁
عمار جبار خضير
2013

اشكرك اخي المحترم بارك الله فيك