من الصغرمنذور **** خادم للحسين

غذوني حبه بالمهد **** واصبح نبض شياني

************

اني من يوم الولاده **** شربــــــــوني حب علي

وطبعو بوجداني صوره **** للحسين اتضوي ألي

امي رضعتني الولايه **** ومنهه اصــــبح منهلي

جابو علك من حضرته **عالمهد امي علكته ** ويم راسي خلو صورته

وأتسجلت من شيعته

سجلوني باول يــــــــــوم **** شيعي وموالي

وللخدمه نذروني هلي **** خادم صبح عنواني

*******************

عالمهد جانت تلولي **** امي تقرالي نشــــــيد

ياحسين انته حبيبي **** ردده اوياهه الوريـــد

وهالنشيد بسر حياتي **** بعــــالم الذر البعيـــد

حبه ويايه انولد ***من كبل جية المهد***بحكمة الغيب انوجد

والحضه بحبه سعد

كلمن يحب حسين **** طـــــــــــاهر المولد

باذن الله طاهر مولدي **** بمحبته برهاني

***************

مرت اسنين العمر**** وكبرت اوياهه خـــــــــــــــــــدمتي

لو تمر شده بحياتي **** يحضر حسين بشــــــدتي

ولو اشوف هموم دنيه **** تنتهي كلهه بدمعتـــي

خدمته تاج اعله راسي**مذهبي حسين واساسي**ضحه ناسه لجل ناسي

شهره ماراد وكراسي

ضحه بنفوس اطهار **** يحـــــــــــــمي العقيده

ضحه بعضيده ومنحره **** شيــــد صرح ايماني

********************

بكل صلاه انه بدعائي **** احمد البــــــاري واشـــــكره

من هداني اعله الولايه **** وزارع بنص روحي فطـــره

وفطرتي حسين وهويتي **** اهلي ربوني اعله فكـــــــره

الله يرحم والديه***غرسو بنفسي الحميه*** وسولفو قصة الزجيه

هيه سر هاذي القضيه

الله يرحم كـــاظم **** وحمزه الزغــــــــــــــير

علموني اكتبله شعر**** ومنهم اخذت اوزاني

*****************************

رؤيه شفت انه بمنامي **** جن قرب يـــوم الاجل

وجهزو تابوت اليه **** واسمع اتنـــــوح الاهــل

بسمه حسيت اعله شفتي **** ولاح الي نور الامـل

هالوضع شكله هضمني***وجن ابو اليمه حضرني ***للمجالس بيده اخذني

كلي مبخوت الخدمني

كال الخدمني يفوز **** يوم القيامـــــــــــــــــه

وجن شفته وقعلي السند **** وبالاخره نجاني

******************

الحسين ما يحتاج الاحد **** هالبشر تحتاج الـــــــــه

وهنياله كل واحد خدم **** واسمه بكتـــابه ايسجلــــه

وخدامه تتباهه بفخر **** من تطـــب الكربلـــــــــــــه

مرفوعه هامات الخدم***توضع بكل مجلس قدم***لا تعب عدهه ولا ندم

وترفع لبو اليمه علم

لوما وجود حســــــــين **** متظل كرامه

ثبتلي من دمه الشرع **** واتثبتت اركاني