منتديات أنا شيعـي العالمية - قصيده لبنت السعوديه

يا سائلي من أكون ومن هي بلادي=جنسيتي والنعم من خير جنسيّه
أنا سعودية أب ...و أم ...و أجدادِ=نعم...أنا موطني أرض السعودية
تَحَتْ سماها صرخت بيوم ميلادي=و على ثراها بدت بالخطو رجليَّه
من بَعْد ما أفخر بدين محمد الهادي=أفخر إذا قلت للعالم سعوديّه
أفخر بليل العباه يكيد حسادي=المدعين إني مظلومة و منسيّه
حرب العدا ما تحرّك ثابت أوتادي=أمشي و أنا بالستر و الزهو مكسيّه
و أفخر إذا قيل (مِحْرَم) قلت وش عادِ=أنا بقربه عن الفساق محمية
أجهر بحبي لها قدام الأشهادِ=تستأهله دولةٍ بالدين مبنية

بلوى الهوى والتقيته دون ميعادِ=والعين لعيونها بالحب مبليّه
لا تسألوا...حبها بالقلب وقَّادِ=و من الغلا ذوّبت بنتٍ شماليّه
محلا غرامٍ بعيني للنظر بادي=أهوى هواها و أنا فيها هواويّه
داري لها القلب..لا خاين ولا معادي=عاهدتها بالوفا و أخلصت أنا النية
ما أبيع دارٍ بحكم الله تنقادِ=حقٍ عليَّ لها ما دامني حَيّه
إذا طعنها عدوٍ نذل فَسَّـادِ=أحس أنا طعنته من حبها فيّه
و لامن رموها بغدر و زور و أحقادِ=تقول أنا اللي بسهم الغدر مرميّه
زيّنت من مجدها برواز لأمجادي=لا حقّقت مجد..مجده ينْحِسِب لِـيّـه
يحلى بها وصفي ويحلى بها إنشادي=أهوى الغزل دوم فيها و الرومنسيّه
عزيزةٍ دوم لو قصّر بها زادي=يكفيني منها رغيف الخبز و الميّه
وش عاد والرزق فيها دوم يزدادِ=والنفس من خيرها عن الغير مَكْفيّه
سلام يملى السهل يا دار و الوادي=و أحلا التحيات يا أرض السعودية