حيّ الوصي بكل و كت ، حَـيْ موقفه و حيّه

و گله المحب لو صُـبَـحْ داره جلد حيّه
شما غيّرْ امحلّـِته و حيّه ، النجف حيّه
يبقى اعلى حوض الوصي متعطّش و مَـيّـته
هذا الفحول التي تلاگيه ترد ميّته
عنده العدو واحِـده هَـيّـن مثل مِـيّـِته
والزلم لو لاگته فنهه الترد حيّه
**********************
يا ليثي يا هزبري يا حيدر و صِلّي
موتي لوَنـّـه بعد ميّة سنه اوصللي
ولو گطّعوني وصل ، لو حرگو اوصلّي
أقسم قسم للوصي بربي الجليل العلي
لو رش رِماحه الدهر مثل الغمايم عَـلَـيْ
أبقى انه من شيعته ولو ردت تنصر علي
سلّم على المصطفى الهادي النبي و صلّي
************************
مو حيدر اللي انفـگـد انفُـگـدت العِزّه
وما يطفي نار الـگـلب إلواسه والعَزَّه
بحـگّ اللي هدّم هُبل واللات والعُزَّه
والـيبخل بحبْ عـلي عـند الله يـنـعـد عاص
ويم تقوة المرتضى كل راهب اصبح عاص
وياهو البُرَزْله وسِلَمْ بس عمروِ ابن الـ ـعاص
وللساع ظل منـچشِـف بالمعركة عَزَّه
*************************
ثغر الدهر ياعلي انته اصبَحِتْ بسمه اله
وياهو اللي بيده الدنى وگـضَّه العمر بِسْمَلَه
وياهو امّه مِنْ اطْلِـگـتْ بيهِ انتخت باسمه اله
يا حـيدر انـتـه الـبـدر ويـلـوح بسمايه
وانته البحر بالغمـگ ما اگول بس مايه
وتـگـول وادم علي مَنْزِلَتْ باسمه آيه
وما تدري حيدر هُوه الباء اللي بالـ ـبسمله
**************************************
علي انته للعدل بيرغ ورايه
ونزل بيك الكتاب ايه وره آيه
من راي النبي رايك ورايه
مُسدّد من وحي ربّ البريّه
******************
فراس القافي
نسألكم الدعاء